Kachin ramkulh, Moemok peng chung ah KIA nih Myanmar ralkap sakhaan pahnih cu nizan zanlei ah an lak, tiah theih a si.
Sakhaan pahnih an lak hnu in Myanmar ralkap lei nih miakpi in mipi umnak tiang kahthlok in an kah i khuami pathum an nunnak a liam, tiah Kachin tualchung thawngpang pawl nih an langhter.
“Atu tiang meithal puah thawng pawl a pikpak in an thang lengmang rih ko. Myanmar ralkap lei a thimi le hliamhma a pumi pawl motor in an thiar lenmi hna kan hmuh,” tiah khuami pakhat nih Kachin thawngzamhnak ah a chim.
March 25 ah abiapi ngaimi Myanmar ralkap sakhaan Alaw Bum cu KIA nih an rak lak i, cu caan thawk cun kahdohnak a fak chinchin.
Nihin zong ah Alaw Bum sakhaan lak tthan ding in Myanmar ralkap nih Fighter vanlawng pahnih in an kah hna. Asinain, atu tiang Alaw Bum cu KIA kut cung ah a um rih.
