(Chinram ah Evangelist, Pastor le biaknak lei rianttuantu 100% chung ah 10% hlei nih ram dawtnak an rak aupi loh!)
Vawlei cung miphun a si mipoh nih kan miphun cu kan dawt, kan ttanh cio hna. Kan Chinram cu Kawl, Kala le Tuluk, (Vawleicung ah miphun tambik a si mi Tuluk, India, Bangladesh) karlak ah kan um. Kan milu a tlawm. Cucaah kan miphunning in kan I ralrin lo ahcun tlau a fawi taktak. Cucaah miphun dang le Cozah bochan loin kanmah tein kan I todelh a hauti kan theih hrimhrim a herh cang. Kanmah tein kan ttuan, kan kawl, kan tuaktan I kan remh lo ahcun miphun dang nih ra riangmang in an kan tuahpiak lai lo ti cu chim hau lo in hngalhcia a si.
Ralkap uknak chia taktak tang ah harsatnak phunkip tuar in khua kan sa. Sifah zong ka ing. Mah miphun holh le ca thiam duhnak le tlaihchan duhnak lungthin zong kan ngei kho lo. A fawinak cun an kan chuh I tlau dihlak in tuah kan si. Mifim/thiam an um hmanh ah thilttha tuah dingah cozah nih rak duh a si lo pin ah tlaihkhih, hrem le nawnnak lawng aa huah mi kan rak si hna. A fawinak in chim ahcun ralkap uknak zulpeng ding in fimthiamnak lam an kan phih kanh I mitcaw hruai in an kan hraui. Anmah fial mi tuahter, a tuah mi lawng duktla ah rak ruah le rak pom kan si. A dik mi zong a dik lo in cawnpiak le pomter kan rak si rih.
Thazaang kan I laak cemnak le a tambik kan theih kan hngalh mi le kan I cawnpiaknak cu biaknak lei a si. Asinain, a dik mi ttanhnak ding ah le kan ral a chia meisei hoi. Pathian lei cawnpiak a tam chinchin, kan ral a chia chinchin ti-awk in kan um hna. Kan ngeih mi hriamnam kan hmang ngam loh. Bible ah Siangpahrang Soul cu thisen chuahnak ah hriamnam pek mi cu a hmn lo caah amah thahnak ah a cang. Kan nih Chinmi tthenkhat cu Pilpit cung lawng ah ralttha emem in kan hman. Thisen chuahnak or kan miphun luatnak le tthanchonnak ah kan fimthiamnak kan hriamnam kan hman ngam loh! Miphun dang nih nehsawh ngai in an kan ti zong ah let ngam hlah. Thildik lo le thil dawh lo an kan tuahter, an kan tuahhnawh zong ah I theihter lo, daiziar in hei um ko. Mah le mah, bukhat le bukhat, pengkhat le pengkhat I tisual vial ah thihngamh in kan cawl I luphum hmanh kan ngamh fawn tung… ningzak le lungfak, zaangfak taktak khi kan si caan hi a tlawm ti loh!
Cucaah, a zeilei poh in a kan cawpiaktu hna nihhin ( biaknak lei nih) Pathian caah raltthanak, le minphun caah raltthatnak le kan sikhawhnak chung in chawva, thlacamnak le pakhat le pakhat dawtnak nun hi an kan cawnpiak deuh ding a si tiah ka rauh. Cu lo ahcun, kan miphun hi kan ral a chia thai lai ti phan a um ko. Kan ral a chiat bu cun mi kan tluk kho hna lai lo, mi kan can kho hna lai lo. Ralchiat cu tthanchonak dawntu thilrit pakhat a si.
Tulio kan boruak zoh tik ah Chin miphun umnak kip ah ramchung le ramleng he camping le crusade a kaakip ah tuah peng a si. Culawng hlah cu bantuk kha bantuk ti poh ah ca’h a si. Cucu a tha lo tinak a si lo. A zeilei khi dah kan I thathnempi? Hi pawl tuahnak caah kan phaisa dihmi hi kan I zoh I, kan ruah tthan ngai cu a hau. Ram caah rianttuantu hna CNF/A hna le Ram le miphun caah rianttuantu hna sin ah kan chawva siang deuh hna usih, a siang cang mi hna zong nih siang chinchin hna usih. Kan thiamnak hmang in ralttha tein chimphuannak le dirpinak langhter hna usih. Chinram ah Evangelist, Pastor le biaknak lei rianttuantu 100% chung ah 10% hlei nih ram dawtnak an rak aupi loh! Hihi ruah cu a hau. An ralchiat ruang ah maw? Tangka …… ka peh ti lai loh!. Kan Thlarau khamh a si khawhnak ding a biapit bantuk in Kan pum nih zalongnak a hmuh le Pathian nih a kan pek mi Ram, Minung hna, Ca le holh, kan nuhrin covo hi zalong tein kan hman le kan khamh khawhnak ding hi a biapi tuk tihi theih ding in sawm kan duh hna. Kan tuah kan ttuan I kan I cawnpiaknak hi thlen awk tete hi kan thlen caan a za cang Chinram ah. Kan fimnak kan chawva kan raltthatnak hna hi Pathian nih pek mi Chinram caah hman a za cangti sawm buin na miphun hawi Chinfa: Salai Laikhal
